Vendosja e raporteve diplomatike mes Kosovës dhe Izraelit po cilësohet si një zhvillim historik. Kjo njohje për Kosovën po cilësohet si një prej më të rëndësishmeve në dekadën e fundit, e cila ka ardhur si rezultat i marrëveshjes së 4 shtatorit të nënshkruar në Washington nga Avdullah Hoti e Aleksander Vucic gjatë kohës kur Administrata amerikane drejtohej nga presidenti Donald Trump.
Implementimi i një marrëveshje të tillë është përshëndetur edhe nga Administrata e re e Shteteteve të Bashkuara të Amerikës, duke thënë se dita e vendosjes së raporteve diplomatike mes dy shteteve ishte një ditë historike.
Zëdhënës i Departamentit të Shtetit, Ned Price, ka thënë se Shtetet e Bashkuara të Amerikës do të vazhdojnë që të jenë në krah të Kosovës përgjatë rrugës drejt integrimit në instancat euro-atlantike.
“Shtetet e Bashkuara të Amerikës përgëzojnë Izraelin dhe Kosovën për formalizmin e raporteve diplomatike. Kjo ditë ishte historike. Lidhjet më të thella ndërkombëtare ndihmojnë në promovimin e paqes dhe prosperitetit për të dy rajonet. Kur partnerët tonë janë të bashkuar, SHBA është e fortë. Amerika do t’i qëndrojë në krah Kosovës derisa vazhdon të lëvizë përpara drejt rrugës euro-atlantike”, ka thënë Price.
Megjithatë vendimi që Kosova të vendos Ambasadën në Jeruzalem nuk i ka pëlqyer fare Bashkimit Evropian. Zëdhënësi Peter Stano një vendim të tillë e ka cilësuar si të “vendim fatkeq”.
Vendosja e raporteve diplomatike dhe njohja e Kosovës nga Izraeli nuk është pritur fare mirë as nga Serbia. Gjithashtu edhe Liga Arabe e ka kritikuar një vendim të tillë.
