Klea Huta këtë pjesë të pushimeve verore është duke i kaluar në vendin fqinj, në Greqi, teksa ndan me ndjekësit e saj në Instagram jo vetëm momentet e bukura që po kalon apo “perlat” e natyrës, por edhe episode që i ndodhin, si i fundit që ka postuar në InstStory-n e saj.
Kështu, gjatë qëndrimit në hotel, Klea ka zbuluar se në fakt gjysma e stafit ishin shqiptarë, edhe pse deri këtu nuk ka asgjë për t’u habitur, duke qenë se në sezonin turistik ka mjaft shqiptarë që punojnë në vendet e rajonit, sidomos në Greqi. Megjithatë mënyra si e ka zbuluar ka qenë sa “funny” aq edhe e zakonshme, me Klean që kishte folur anglisht gjatë gjithë kësaj kohe, deri kur i kishte dëgjuar të shanin në shqip dhe në atë moment cdo gjë u bë e qartë.
“Kur kupton që stafi i hotelit në Greqi janë shqiptarë, sepse shau shqip. Dhe ti ke folur një ditë e gjysme anglisht”- shkruan artistja, bashkangjitur me postimin.
Ajo që na bën habi më shumë është si nuk e kanë njohur Klean, duke qenë shqiptarë, dhe t’i kishin folur menjëherë në gjuhën e tyre, duke mos e lënë të përdori anglishten, ndërkohë sa i takon pjesës tjetër, po të kishim 200 lekë për cdo shqiptar që kemi “zbuluar” nga të sharat në gjuhën tonë, do ishim edhe ne me pushime në Greqi tani… 
