Gjykata Themelore e Prizrenit ka vendosur masën e arrestit shtëpiak ndaj Salzen Ajradini, pronarit të kompanisë “Master Projekt” i cili u ndalua të martën nga Policia pasi një punëtorë i kësaj kompanie u rrëzua dhe pësoi lëndime të rënda trupore gjatë orarit të punës.
Mëson se Salzen Ajradini, është njëri nga pronarët e kompanisë “Master Projekt”. Ai po dyshohet për veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”.
Avokati mbrojtës, Blend Gjini, ka thënë për Gazetën Insajderi se klienti i tij, nuk është përgjegjës për rrethanat e lëndimit të punëtorit.
Sipas tij, arkitekti i projektit është përgjegjës dhe pritet të merret në pyetje nga prokuroria
“Sot e kemi pas seancën dëgjimore. Kërkesa ka qenë për arrest shtëpiak për të cilin dhe është marr vendim. Ky akuzohet për rrezikim në vendin e punës dhe mungesë të pajisjeve të mbrojtjes. Por, punëtori që është rrëzu i ka pasur të gjitha pajisjet mbrojtëse pra me kapel me tesha mbrojtëse me sigurim me krejt i ka pas në momentin kur është rrëzuar”, thotë avokati.
Avokat Gjini, thotë se po ashtu punëtori i lënduar ka pasur dy marrëveshje me kompaninë se në rast të rrezikshmërisë në punë, përgjegjës është punëtori për mbajtjes ose jo të pajisjeve mbrojtëse.
“Prokurorisë i janë dorëzuar dy marrëveshje ku punëtori i lënduar ka pasur marrëveshje me ‘Mastër Projket’ se ky e merr përgjegjësin për masat mbrojtës në rast se ndodh diçka”, tha ai.
Ngjarja ka ndodhur të martën pasdite, teksa punëtori ishte duke punuar në objektet e “Master Project” në Prizren.
Prokurori i Shtetit, dje kishte dhënë urdhëruar që ndaj pronarit të caktohet masa e ndalimit policor.
Ndërsa, punëtori i lënduar i moshës 40-vjeçare ka pësuar lëndime të rënda trupore dhe për shkak të gjendjes së tij shëndetësore është transferuar me urgjencë në Qendrën Klinike Universitare të Kosovës për trajtim të mëtutjeshëm mjekësor
