Nëse ndiqni vendpushime luksoze ose influencues të udhëtimeve në Instagram, shanset janë që të keni parë të paktën një “mëngjes lundrues”.
Në rast se nuk jeni njohur me të, ja çfarë duhet të dini: Është mëngjesi tipik i shërbimit në dhomën e hotelit – mendoni për dolli, fruta, kafe dhe të ngjashme – por të shërbyera në një pishinë ose vaskë në vend të shtratit.
Zakonisht, ato vendosen në pjata të mëdha ose shporta shumëngjyrëshe, pastaj dekorohen me lule tropikale për t’i bërë ato edhe më “fotozhenike”. Këto mëngjese janë veçanërisht të popullarizuara në Azi dhe Paqësor, veçanërisht në vendpushimet private të vilave me mot të ngrohtë në vende si Tajlanda, Fixhi dhe Maldivet. Pothuajse të gjithë bien dakord që tendenca filloi në Bali, megjithëse asnjë vendpushim specifik nuk duket se merr meritat për të thënë se doli më parë me idenë.
Ndërsa këto mëngjese janë bërë më të zakonshme në menutë e pushimeve gjatë pesë viteve të fundit, pandemia e koronavirusit i ka bërë ato më të popullarizuara se kurrë pasi mysafirët e hotelit po shmangin bufetë dhe dhomat e mëdha të ngrënies.
“Gjatë vitit të kaluar, darka në suitë është bërë jashtëzakonisht e popullarizuar, veçanërisht për ata që kërkojnë ngushëllim në sigurinë dhe komoditetin e apartamentit të tyre,” tha Jann Hess, menaxher i një resorti në Bali për CNN Travel. “Edhe mëngjesi lundrues është kthyer në një zgjedhje popullore. Zakonisht vendoset në një pishinë private.”
Përtej “të dukurit në Instagram”
Megjithëse ngjyrat e mrekullueshme dhe sfondi me pishinë i bën ato të duken perfekte në rrjete sociale: A janë bërë këto mëngjese vetëm për t’u hedhur në internet, apo njerëzit me të vërtetë kënaqen duke ngrënë në pishinë?
James Booth, një reporter me qendër në Sidnei për DMarge.com, thotë për CNN Travel se, për të, vakti “lundrues” funksionoi më mirë në koncept se në ekzekutim. Sipas tij, mëngjesi duket bukur në foto, por idealja mbetet të konsumohet si zakonisht. Ndoshta një kamarier mund ta rimarrë mëngjesin nga pishina dhe ta vendosë diku pranë. Kjo nuk do të thotë se të gjithë e shohin si James.
Fotografitë e bukura janë dhe një mjet i mirë marketingu. Njerëzit shohin mëngjesin, shohin vendin e etiketuar në foto dhe më pas, duan ta provojnë vetë përvojën.
Burimi: CNN
